الميعاد


بقلم الاعلامي مفيد عباس


اضطر ، وانا المسؤول عن توفير احتياجات المنزل، إلى الخروج اذا ما لزم الامر، بس قبل ما اطلع من البيت اتحزم بحزام ذيب ، وحزام الذيب في زمن الكورونا هو چفوف وكمامات، واحاول لمن امشي ما اباوع على اي واحد بالشارع يصير گبالي، حاله مثل حالي كونه مسؤول عن متطلبات بيته، لأن أغلب الناس اعرفهم ويعرفوني، حتى ما اضطر اسلم عليه أو يسلم علية ونوگف نسولف عن أي شيء بيننا مشترك ، لاسيما أنني لست متواجدا في محلتنا الصغيرة خلال الأربع سنوات التي خلت، يعني راح اول شي اسمعه : خلف الله عالكورونا خلتنا نشوفك! بالاعدادية اول حب من طرف واحد، طبعا، چان لبنية اسمها ميعاد ، وچانت اكبر مني ، موظفة وكل يوم تفوت من يم بيتنا ، لابسة يونيفورم جوزي والكعب عالي ، والأنوثة مليون ونص. اذا دوامي ظهري اروح اصعد بسيارة وليد اخوية البرازيلي قيل متجي، واعلگ أغنية لامل خضير، سجلتها على كاسيت بكرة ابو الساعة ، بحيث الكاسيت كله أغنية وحدة، تخلص وتنعاد ، تخلص وترجع تگول : على الميعاد اجيتك اجيتك اجيت وما لگيتك مالگيتك انت نسيت وعدي .. عمري ما نسيتك . الى اخر الأغنية. هي تضحك .. اني ارتاح .. وهاي هية لمن صرت بالكلية بعد ولا شفتها .. وضاعت اخبارها . البارحة العصر رحت دا اجيب صمون من فرن ابو فاضل ، وفرن ابو فاضل صارلي اكثر من عشرين سنة مجايب منه صمون لان فرن ابو سعدون اقرب ، بس البارحة چان ابو سعدون معزل لهذا رحت لابو فاضل . واني واگف عالشباچ وحدي ، اجتي مرية لابسة عباية، هم جاية تشتري صمون، لمن اقتربت سلمت : _ وعليكم السلام _ معرفتني؟ _ لا والله ولا زغرا بيچ _ اكو وحدة چانت كل يوم تفوت وتعلگلها أغنية على الميعاد اجيتك. _انت ميعاد ؟مستحيل ! _ اي اني ميعاد ايباااااه .. فات المعاد وكلكم عيوني

0 عرض0 تعليق

397 WYANDOTTE STREET WEST

WINDSOR, ON N9A 5X3

(519) 254 - 2000

icgo.canada@outlook.com

© 2023 by The Artifact. Proudly created with Wix.com