سوالف عراقية.... بلاك فرايداي

بقلم: الاعلامي مفيد عبّاس

بامريكا البارحة عدهم الجمعة السوداء، وهي اخر جمعة من شهر دعش تجي بعد عيد الشكر الامريكي. داعيكم هم چانت عنده الجمعة السوداء ، لمن بالستة الصبح اندگت الباب، بس دگة من هاي التخرع ، دوم دوم دوم ، مو دوگ دوگ دوگ ، وهاي الباب مالتنا الحداد من سواها ، سواها عاللمس ، بس واحد يخلي ايده عليها يطلع صوت، ومن وراها فد يوم تصير بيه خرعة ، لأن كل ما تندگ اگول انقصفنا . بالستة من اندگت الباب بهالطريقة، گمزت ، بس گمزت واني مغمض ، وهذا الشباچ مال الغرفة دائما اعوفه مفتوح بالشتا ، لان ما احب الشبابيك المغلقة، احس روحي تنقبض ، اسم الله عليكم من قبوضية الروح، والغرفة مالتي هلگد ما (چبيرة) جبتلها اثاث هواية حتى تملي المساحات ، بس بقت النص متر الفاصلة بين الچرباية والشباچ ، احتاريت شأخلي بيها ، مرة اگول اجيبلها كرسيين وميز دائري لطيف ، حتى بالليل قبل ما انام ، واني لابس البجامة المارونية المنقطة بنقط بيضاء صغيرة من محلات سميوني للبجايم البازة، اللي اجتني هدية بمناسبة عيد الرجل العراقي المظلوم ، والبس فوگاها الروب الماروني نفس مال انور وجدي بفلم (شباك حبيبي) اللي ليهسة ملابسه، واگعد عالكرسي القريب من الشباچ المفتوح والزملي كتاب واقرأ بي ، ولمن ادوخ ، بس اشمر الكتاب وانزع الروب وانسدح عالجرباية بحركة چقلمبية ، بس مگدرت احقق هذا الحلم ، لان الطريق راح ينسد ، ولازم كلما اريد انزل من الچرباية انزل من يم الرجلينات ، يعني لازم اگوم امشي عالجرباية ، واذا اگوم امشي على حيلي عالچرباية اطخ بالبنكة ، لان جربايتي سويت علوها متر، كلش احب الارتفاع عن سطح الارض ، ولهذا لغيت فكرة الميز والكرسيين ، وراحت وياهن شغلة الروب. لمن گمزت من الچرباية مخروع بسبب دگة الباب ، والدنيا ظلمة ، وعيوني بعد بيهن بقايا الحلم اللذيذ ، اول مانزلت رجلي، چلبت بالواير مال شاحنة اللاب توب واني ما ادري ، اول خطوة خطيتها وگع اللاب توب من الميز مال الجرباية للگاع ، صحاني صوته اكثر ، بس عفته يواجه مصيره المحتوم لان كلشي ماشوف ، والله من عنده تذكرت الشباچ ، سديته ومشيت ، بس ماتذكرت الباب مسدودة ، وثاني شي يواجه مصيره بهاي الجمعة هو خشمي ، الاكثر ارتفاعا ، لمن انلطخت بالباب صحيت ، فتحت الضوه وفتحت الباب وطلعت ، لفيت الييشماغ على خشمي ورحت فتحت الباب الخارجي : - عمو .. ام زهرة تگول جيبوا جدركم اخليلكم بي هريسة !! هاي هريسة مال بلاك فرايدي؟ # وكلكم_عيوني


0 عرض0 تعليق

397 WYANDOTTE STREET WEST

WINDSOR, ON N9A 5X3

(519) 254 - 2000

icgo.canada@outlook.com

© 2023 by The Artifact. Proudly created with Wix.com