طب أغسل



بقلم: الاعلامي مفيدعبّاس

العصرية وقبل الغروب، تصعد قسم من النسوان مال الطرف يفرشن السطوح بعد رشه بالماء رشة خفيفة لتلطيف الأجواء، والقسم الثاني بالمطبخ يگللن للعشا.

اني بهذا الوكت صاعد وية امي، مو حتى اساعدها، وإنما حتى اشتم روائح القلي الشهية، لمن چان البيتنجان المقلي لو العروگ والطماطة الهن ريحة تجيب التايه، وفعلا، من مصدر الريحة نعرف اليوم شنو مگلية ام خضير لو ام محمد لو بيت سعود شنو عشاهم اليوم، ومن عادات الناس الطيبة بهذاك الوكت هو تبادل الصحون، لهذا انت تطب للمطبخ تشوف امك تگللي طماطة، بس لمن يجي العشا تشوف الصينية بيها كبة حلب وبيتنجان وبتيتة، وهذا حال كل البيوت.

العشا چان من وكت، بعد الغروب بشوية، وبعد العشا بساعة لو ساعتين الناس يصعدون ينامون، ولأنه السطوح متلازگة، لازم منحچي بصوت عالي، حتى ليسمعون الجيران، والكبار يصَعدون وياهم الراديو حتى يسمعون أخبار لندن شتگول عن أحداث الحرب الأهلية اللبنانية التي كانت تتسيد اهتمامات العراقيين السياسية في حينها رفقة القضية الفلسطينية، وفد يوم سمعنا خضير جيراننا الحايط عالحايط شال الراديو وكسره لمن سمع خبر مجزرة تل الزعتر، وياها بصوت عالي : خرب شيب ابهاتكم.

قصة النجوم وحساب النجوم لمن چنا نشوفها بالآلاف، قبل متنترس سمانا بغازات المولدات والسيارات ومتغيرات بيئية خطيرة، چنت اباوع عليهن واتذكر سوالف الأستاذ كامل الدباغ عنهن : النجمة الچبيرة وضواها ابيض هذا كوكب المشتري، والأحمر هو المريخ.. زين والباقيات شنو أسماءهن.. أسأل نفسي.

ايام قليلة كلش چانت حارة بليالي الصيف، وباقي الليالي نصعد نلگه الفراش بارد، احط خدي الايمن، جهة التفكير، على طرف المخدة، حتى لمن أدير وجهي على الجهة اليسار، جهة النوم، تبقى باردة.

الحارس، او الچرخچي، چان يگعد بالطرمة مال بيت ابو فؤاد، مقابيلنا، يعوفله الباب مفتوحة، يطلع ياخذله فرة كل شوية ويضرب صافورة ويرجع يگعد عالكرويتة، وعادة يزيد عدد صافوراته ليلة الخميس عالجمعة وية رجعت السهرانين، ولمن يفوتون يسلمون عليه، هو يجاوبهم بزهو، كونه صاحي ويراقب بشكل جيد، ولمن يصبح الصبح يروح يسلم تفگته للمركز مال الشرطة براس شارعنا ويروح ينام.

الصبحية نطلع نلعب تصاوير عالفي مال بيت ام حسن هادي، والعصر طوبة، والبجايم البوبلين تنشگ من الركبة من كثر الچبحات، والكوشة مال النعال ابو الإصبع تنگطع، نخلي بمكانها دنبوس ابو راسين حتى ليفلت الاصبع، وأول حچاية اسمعها لمن اطب للبيت : طب اغسل.. وكلكم عيوني

0 عرض0 تعليق

397 WYANDOTTE STREET WEST

WINDSOR, ON N9A 5X3

(519) 254 - 2000

icgo.canada@outlook.com

© 2023 by The Artifact. Proudly created with Wix.com