Made In Iraq




بقلم: الاعلامي مفيد عباس

احد منكم سامع الان بوجود قماش عراقي بالسوگ، أو بطانية عراقية أو چرچف أو وجه مخدة أو حذاء عراقي ؟

بس كلنا سامعين بمعمل الغزل والنسيج القطني ومعمل الغزل والنسيج الصوفي، والمعملين بالكاظمية الاول بساحة عدن والثاني قريب الكورنيش واللي چان اسمه معمل فتاح باشا، وسامعين وشايفين بجلود اللي بالكرادة

منشآت كبيرة مع آلاف الموظفين ، لكن بلا انتاج يذكر

من زمان ، المنتج العراقي الحكومي يمتاز بالجودة ويفتقد للشكل والموديل المناسب البطانية صوف خالص بس لونها املح وخشنة وتچكچك والحذاء كله جلد بس مجعمر والقميص مال المحمودية قماشه قطني بس موديله قديم وفانيلات الكوت قطن خالص بس دلعتها چبيرة

اذا وزارة الصناعة مابيها خير تعيد العمل بهاي المنشآت خلي تنطيها لصناعيين عراقيين بصيغة استثمار أو خصخصة او اي شكل يضمن مصلحة الطرفين واكيد المستثمر يفكر بمصلحته وراح ينتج

قمصان موديلاتها احدث واحذية انيقة وبطانيات أقل چكچكة وبالحافة مكتوب عليها.

Made In Iraq

.. وكلكم عيوني


0 عرض0 تعليق

397 WYANDOTTE STREET WEST

WINDSOR, ON N9A 5X3

(519) 254 - 2000

icgo.canada@outlook.com

© 2023 by The Artifact. Proudly created with Wix.com